Dass i mi fia d' Stean intaressia, aun den is mae Oma (+1979)
schuid, sie hot ma scho, wia i kloa woa, vü drüba vazöht. Wia
i in d' schui gaunga bi, is efta zu uns a Hobby-Astronom (da Herr Auracher)
in d' Werkstot vo main Votan kemma, wo a wieda aun de Trimma vo saen Obsawatotium
umanaundbastelt hot. Amoi hob i sogoa duach sae Fernrohr (a Spügiteleskop)
auf a klans Stücki van Mond (bai ana unhaemlichn Vagressarung) schaun
deafn; vo eam hob i daunn a an Spüigi (~ 2000 mm Brennwaetn, 140 mm Duachmessa)
gkriagt, inzwischn is dea oba scho blind worn. Wia i daunn vor mehra Joahr
übalegt hätt, mit den Spüigi do a Teleskop zan baun, hob i
in an Gschäft a günstigs FERTIGS Modö gsegn, do hob i ma denkt,
de Bastlaraen losst liaba blaebn, und hob ma des gschaete Trumm gkaft.
Mit den Reflektor (so nennt ma a so a Trumm, übrigens
hot 's 1000 mm Brennwaetn und 114 mm Duachmessa) bin i so maunche oftmois
aesige Nocht im Fraen und schau in Hümmi. Dabai san ma, obwoi sd' unhamlich
laung belichtn muasst (bis zu 20" bai an 400-ASA-Fülm), scho a poar gaunz
brauchboare Fotos
wordn. Bein Fotografian bin i recht froh drüba, dass des Trumm parallaktisch
montiert is und a Motor fia 's Waetaruckn do is.